ՀՈՒՇԱՐՁԱՆՆԵՐ

Գտնվում է Ազատության պողոտայում՝ Հաղթանակի զբոսայգու տարածքում։

Նվիրված է Հայրենական մեծ պատերազմում (1941–1945) տարած հաղթանակին։

Բացվել է 1950 թ. նոյեմբերի 29-ին՝ Հայաստանի խորհրդայնացման 30-ամյակի օրը։ Համալիրի և ամբողջ զբոսայգու նախագիծը կազմել է ճարտարապետ Ռաֆայել Իսրայելյանը։ Նա է նախագծել նաև այն հսկայածավալ, քանդակազարդ բարձր պատվանդանը, որի վրա պետք է տեղադրվեր հաղթանակի հուշարձանը (մոնումենտը)։

1970 թ. Ռաֆայել Իսրայելյանի նախագծով կառուցվել է նաև Անհայտ զինվորի գերեզմանը՝ հավերժական կրակով։ Զինվորի աճյունը բերվել է Մոզդոկ քաղաքից, որը Հայրենական մեծ պատերազմի տարիներին ազատագրել են 89-րդ հայկական Թամանյան դիվիզիայի մարտիկները, և վերաթաղվել է «Մայր Հայաստան» հուշարձանի դիմաց։

1983–1985 թթ., Մեծ հաղթանակի 40-ամյակին ընդառաջ, հուշահամալիրը վերանորոգվել է (ճարտարապետներ՝ Աշոտ Ալեքսանյան, Անահիտ Նավասարդյան)։ Վերակառուցվել և ավելի հանդիսավոր տեսք է ստացել Անհայտ զինվորի գերեզմանը, կառուցվել է Հերոսների ծառուղին։

Ռաֆայել Իսրայելյանի մահից 10 տարի անց՝ 1983 թվականին, նրա էսքիզներով և որդու՝ Արեգ Իսրայելյանի նախագծով, Ազատության պողոտայի կողմից կառուցվել է զբոսայգու մուտքի հաղթակամարը՝ միմյանց չկրկնող հարթաքանդակներով։