ԹԱՆԳԱՐԱՆՆԵՐ ԵՎ ՊԱՏԿԵՐԱՍՐԱՀՆԵՐ

«Մայր Հայաստան» ռազմական պատմության թանգարանում ներկայացված են Երկրորդ Համաշխարհային պատերազմում հայ ժողովրդի մասնակցությանը և Արցախյան ազատագրական պատերազմին վերաբերող փաստավավերագրական նյութեր:

1970 թվականին, ի նշանավորումն Հայրենական Մեծ պատերազմի հաղթանակի 25-ամյակի՝ բացվում է «Հայաստանը Հայրենական մեծ պատերազմում 1941-1945 թվականներին» թանգարանը։ 1995 թվականին այն վերանվանվում է «Մայր Հայաստան» ռազմական թանգարան և անցնում ՀՀ ՊՆ ենթակայության ներքո։ 

Թանգարանը տեղակայված է «Մայր Հայաստան» հուշահարձանի պատվանդանի ներսում:

Մայր Հայաստանի հուշահամալիրը կառուցվել է ի նշանավորումն ԽՍՀՄ-ի՝ Հայրենական մեծ պատերազմում տարած հաղթանակի։ Բացվել է Հայաստանում խորհրդային կարգերի հաստատման 30-ամյակի օրը` 1950 թ.-ի նոյեմբերի 29-ին Հաղթանակ զբոսայգում:

Հուշահամալիրի հեղինակը անվանի ճարտարապետ Ռաֆայել Իսրայելյանն է: Հուշահամալիրում տեղադրված է եղել ԽՍՀՄ ժողովրդական նկարիչ Սերգեյ Մերկուրովի հեղինակած Իոսիֆ Ստալինի 17 մետր բարձրությամբ պղնձե արձանը։ 1961 թ.-ին արձանը հանվել է, իսկ 1967 թ.-ին նույն պատմանդանին տեղադրվել է Հայաստանի ժողովրդական նկարիչ, քանդակագործ Արա Հարությունյանի հեղինակած 22 մետր բարձրությամբ «Մայր Հայաստան» պղնձե արձանը: Քանդակագործին հաջողվել է կապ ստեղծել նոր քանդակի և հին պատվանդանի միջև ինչպես կոմպոզիցիայի, այնպես էլ դեկորատիվ դետալների միջոցով։ Ստալինի քանդակի պահպանված բեկորները (աչք և կոշիկ) օգնել են նրան հավասարակշռություն գտնել հին և նոր հուշարձանի չափերի միջև։

Մայր Հայաստանի հուշահամալիրը նախագծվել է հայկական եռանավ բազիլիկ եկեղեցու կառուցվածքով, ընդհանուր բարձրությունը 51 մետր է, քանդակինը` 22 մետր, սրի երկարությունը` 11 մետր։ Պատվանդանը, ի հակադրություն արտաքին ուղղանկյուն ձևի, ներսից հայկական գմբեթավոր եռահարկ եկեղեցի է և հիշեցնում է Էջմիածնի նշանավոր Սուրբ Հռիփսիմե եկեղեցին (7-րդ դար)։ Հուշահամալիրը կառուցված է տարբեր երանգների սև տուֆով։ Նախշազարդ կամարներն ու խոյակները և պղնձե դուռը մեծ շուք են հաղորդում կոթողին, իսկ 4 անկյունների բարձրադիր բաց պատշգամբներից երևում է մայրաքաղաքի ողջ համայնապատկերը։

Պատվանդանի շուրջ խորհրդային զինատեսակների տարբեր նմուշներ են ցուցադրված։ Դրանց թվում են զրահապատ հետևակային մեքենա, զրահամեքենա-152, Т-34 տանկ, МиГ-19 ինքնաթիռ, Կատյուշա БМ-13, 76 մմ զենիթային գնդացիր, С-75 զենիթային հրթիռ համակարգ:

Հուշահամալիրի գաղափարական ընդհանուր մտահղացման մաս են կազմում նաև «Անհայտ զինվորի գերեզմանը», դեպի այն տանող «Հերոսների պուրակը», ինչպես նաև մարշալ Հովհաննես Բաղրամյանին և ռուս սահմանապահներին նվիրված ծառուղիները։

ԱՅՑԵԼՈՒԹՅԱՆ ՄԱՍԻՆ ՏԵՂԵԿԱՏՎՈՒԹՅՈՒՆ

«Մայր Հայաստան» ռազմական պատմության թանգարանն ունի ավելի քան 30 000 ցուցանմուշ: Ցուցադրությունը կազմված է երկու հիմնական մասից՝ «Հայ ժողովրդի մասնակցությունը Երկրորդ Համաշխարհային պատերազմին» և «Արցախյան ազատագրական պատերազմ»։

Առաջին հարկում ներկայացված են Երկրորդ համաշխարհային պատերազմում հայ մարտիկների, նրանց ռազմերթերի մասին նյութեր, ինչպես նաև` մարշալ Հովհաննես Բաղրամյանի անձնական իրերը:

Երկրորդ հարկի ցուցասրահում ներկայացված է Արցախյան պատերազմի վավերագրությունը` փաստաթղթեր, լուսանկարներ, մարտական գործողությունների նկարագրական նյութեր:

ԺԱՄԵՐԸ ԵՎ ՄՈՒՏՔԸ

Երեքշաբթիից ուրբաթ՝ 10:00-17:00
Շաբաթ-կիրակի՝ 10:00-15:00

ՄՈՒՏՔ

Մուտքը՝ անվճար