ՊԱՏՄԱՄՇԱԿՈՒԹԱՅԻՆ ՇԵՆՔԵՐ

1927 թ

Պետ․ ցուցիչ՝ 1․6․52

Ճարտարապետ՝ Նիկողայոս Բունիաթյան

Գտնվում է Նալբանդյան փող․ 96 հասցեում։

Խորհրդահայ բնակել ճարտարապետության առաջին շինություններից է՝ կառուցված Երևանի առաջին գլխավոր ճար­տարապետ (1924-1938) Նիկողայոս Բունիաթյանի նախագծով։

1927-1936 թթ. այս տանն ապրել է հայ մեծանուն գրող, բանասեր, թարգմանիչ Ակսել Բակունցը (Ալեքսանդր Ստեփանի Թադևոսյան, 1899-1937):

Տունը նախապես միահարկ էր՝ բաղկացած է չորս բնակարանից: Կենտրոնական մուտքի մոտ խմբավորված էին երկու սենյակով, ծայրերում` երեք սենյակով բնակարանները: Տան գլխավոր ճակատը ծեփապատ էր, որի վրա առանձնանում էին սև տուֆից ճարտարապետական տարրերը` քիվը, անկյուններում տեղադրված ուղղաձիգ, ռիթմիկ կրկնվող կվադրերը: Տանիքը երկթեք էր, կղմինդրածածկ:

Առաջին հարկն այժմ հատկացվել է խանութներին:

1939 թ., պահպանելով գլխավոր ճակատի լուծումը, կառուցվել է շենքի երկրորդ հարկը, ավելի ուշ՝ երրորդը: Բակի կողմից կատարվել են շատ փոփոխություններ:  

1970 թ․ շենքի մոտ տեղա­դրվել է Ակ. Բակունցին նվիրված գեղաքանդակ հուշակոթող (նարնջագուն տուֆ, չափերը՝ 0,40 x 0,40 x 2,55 մ, ճարտա­րապետ՝ Օլեգ Շոկարև, քանդակագործ` Էդ. Մ. Աղայան, պետ. ցուցիչ՝ 1.6.52.1), որի ստորին մասում փորագր­ված է․ «ԵՐԵՎԱՆՅԱՆ ԱՅՍ ՏԱՆԸ ԲԱԲԱԽԵԼ Է ԱԿՍԵԼ ԲԱԿՈՒՆՑԻ ՍԻՐՏԸ. ԼՍՈՒՄ ԵՍ՝ ԾԻՐԱՆԻ ՓՈՂՆ Է ՄՈՐՄՈՔՈՒՄ, ԱԼՊԻԱԿԱՆ ՄԱՆՈՒՇԱԿՆ Է ԲՈՒՐՈՒՄ, ԵՎ ԾԵՐ ՄՈՒՐՈՆ ՊԱՏՄՈՒԹՅՈՒՆՆԵՐ Է ՊԱՏՄՈՒՄ․ ԱԿԱՆՋ ԴԻՐ ԱՆՑՈՐԴ»։

Շենքի պա­տին ամրացված է նաև Բակունցին նվիրված հուշատախտակ։

 «Պատմամշակութային ժառանգության գիտահետազոտական կենտրոն» ՊՈԱԿ

Երևանի քաղաքապետարան