ԹԱՆԳԱՐԱՆՆԵՐ ԵՎ ՊԱՏԿԵՐԱՍՐԱՀՆԵՐ

Գևորգ Գրիգորյանի (Ջոտտո) արվեստանոց-թանգարանում ներկայացված են նկարչի ստեղծագործական ժառանգությունը, հուշաձեռագրային նյութեր, անձնական իրեր։

Թիֆլիսից Երևան տեղափոխվելուց  հետո մինչև կյանքի վերջ Պլեխանովի 5, այժմ Մաշտոցի 45ա հասցեում գտնվող այս տանը ապրել և ստեղծագործել է արվեստագետ զույգը՝ գեղանկարիչ Գևորգ Գրիգորյանը՝ Ջոտտոն, և իր կինը՝ նկարչուհի, բանաստեղծուհի Դիանա Ուկլեբան:

Գևորգ Գրիգորյանի գեղարվեստական մտածողությունը ձևավորվել է ծննդավայր Թիֆլիսում: 1920-ականների վերջը և 1930-ականների սկիզբը նկարչի ստեղծագործական  վերելքի տարիներն էին, երբ նա ակտիվորեն մասնակցում էր Թիֆլիսի մշակութային  կյանքին, հայ և վրացի նկարիչների ցուցահանդեսներին: Դրանց  հաջորդել է նկարչի կյանքի ծանր շրջանը. արվեստի աշխարհում մերժված լինելու ու մեկուսացման երկու տասնամյակ ձգվող տարիներ, որոնց ընթացքում արվեստագետը համառորեն շարունակել է ստեղծագործել: 1950-ական թվականներին նրա արվեստը սկսեց նորովի ընկալվել ու վերարժևորվել, իսկ 60-ական թվականները նշանավորվեցին կարևոր փոփոխություններով:

1962 թ. նկարիչը իրականացնում է իր  մեծագույն երազանքը՝  կնոջ հետ հաստատվում է Երևանում, որտեղ էլ մինչև կյանքի վերջը մեծ խանդավառությամբ շարունակում է ստեղծագործել՝ հարստացնելով իր արվեստը նոր թեմաներով ու արտահայտչամիջոցներով:

Նկարչի մահից մեկ տարի անց՝ 1977թ., Դիանա Ուկլեբայի նախաձեռնությամբ  արվեստանոցը ստանում է թանգարանի կարգավիճակ: 1987  թվականին շենքի վերակառուցումից հետո  ցուցասրահներն ընդարձակվում  են, թանգարանին հատկացվում  է երկրորդ հարկը, և այն դառնում է Հայաստանի ազգային պատկերասրահի մասնաճյուղ:

ԱՅՑԵԼՈՒԹՅԱՆ ՄԱՍԻՆ ՏԵՂԵԿԱՏՎՈՒԹՅՈՒՆ

Գևորգ Գրիգորյանի արվեստանոց-թանգարանում ներկայացված են նկարչի ստեղծագործական ժառանգությունը, հուշաձեռագրային նյութեր, անձնական իրեր:

2023 թվականի վերանորոգումից  հետո ցուցասրահներից  մեկն   անվանակոչվել է Դիանա Ուկլեբայի պատվին. այստեղ ցուցադրված են նկարչուհու  գեղանկար աշխատանքները,  արվեստագետ  զույգի  գրքերի հարուստ հավաքածուն, որը ծառայում է նաև որպես գրադարան այցելուների համար:

Թանգարանում իրականացվում են էքսկուրսիաներ, կրթական ծրագրեր, դասախոսություններ, տարբեր մշակութային միջոցառումներ, կազմակերպվում են ժամանակավոր ցուցահանդեսներ:

ԺԱՄԵՐԸ ԵՎ ՄՈՒՏՔԸ

Երեքշաբթիից կիրակի՝ 11:00-18:00

ՄՈՒՏՔ

Մեծահասակներ - 1000 դրամ
Դպրոցական, ուսանող, թոշակառու - 500 դրամ

ԷՔՍԿՈՒՐՍԻԱ

Հայերեն/օտար լեզուներ – 3000 դրամ