ՊԱՏՄԱՄՇԱԿՈՒԹԱՅԻՆ ՇԵՆՔԵՐ

1950 թ.

Պետ. ցուցիչ՝ 1.6.158

Ճարտարապետ՝ Գրիգոր Աղաբաբյան,

Պատվիրատու՝ ՀԽՍՀ Առևտրի մինիստրություն

Շինարարական կազմակերպությունը՝ «Երևանշին» տրեստ

Սառցակոմբինատը գտնվում է Արշակունյաց պողոտայի և Սևանի փողոցի հատման մասում՝ Արշակունյաց պողոտա 9 հասցեում:

Շենքը ներքին բակի շուրջ համախմբված, չորս առանձին, տաք անցումներով իրար հետ հաղորդակցվող ծավալներից կազմված համալիր է: Գլխավոր մասնաշենքը խուլ, ամփոփ ծավալ է՝ գլխավոր ճակատով ուղղված դեպի Արշակունյաց պողոտա: Ճակատային հարթությունը հարդարված է հինգ կամարակապ, խոյակազարդ որմնասյուներով և կամարաշարում քանդակված վարդյակներով: Կամարաշարից վեր կիսաշրջանաձև, քանդակազարդ վերնամասով նեղ պատուհաններ են: Հարդարանքն ամբողջացնում է նուրբ, զարդանախշ քիվը՝ ճակատին տալով որոշակի արտահայտչականություն:

Հատակագծային լուծումները թելադրված են կառույցի տեխնոլոգիական նշանակությամբ: Կառուցված է վարդագույն, սրբատաշ տուֆից, միդիս շարվածքով: Օգտագործված է երկաթբետոնե կոնստրուկցիա: Որմնախարիսխը գորշ, կոպտատաշ բազալտից է:

Սառցակոմբինատի շենքը խորհրդային Երևանի արդյունաբերական հետաքրքիր կառույց­ներից է: Աչքի է ընկնում ճարտարապետական լուծումների գեղարվեստական բարձր մակարդակով, պատերի տեկտոնիկ լուծման հետաքրքիր ձևերով:                                                                                                                              

«Պատմամշակութային ժառանգության գիտահետազոտական կենտրոն» ՊՈԱԿ

Երևանի քաղաքապետարան