ՀՈՒՇԱՐՁԱՆՆԵՐ

2001 թ.

Քանդակագործ` Տիգրան Արզումանյան

Ճարտարապետ` Է. Աբաղյան

Հուշարձանը գտնվում է Նուբարաշեն վարչական շրջանում՝ Պողոս Նուբար փաշայի անվան զբոսայգում:  

Կիսանդրի է՝ տեղադրված հարթակի վրա կանգնեցված բարձր ու սրբատաշ պատվանդանին: Պողոս Նուբար փաշայի դիմագծերը ռեալիստական են: Պատվանդանի դիմային ճակատին բրոնզե տառերով գրված է.

ՊՈՂՈՍ / ՆՈՒԲԱՐ / ՆՈՒԲԱՐՅԱՆ :

Նյութը` բրոնզ, գրանիտ:

Պողոս Նուբար փաշան (Պողոս Նուբար Նուբարյան, 1851-1930) եղել է հայ հայտնի գործարար և բարեգործ,  Հայկական Բարեգործական Ընդհանուր Միության հիմնադիրներից և առաջին նախագահ, հայկական ազգային շարժման առաջնորդներից, Եգիպտոսի հայազգի եռակի վարչապետ Նուբար փաշա Նուբարյանի որդին: Ղեկավարել է սփյուռքահայ ազգային պատվիրակությունը Փարիզի խաղաղության վեհաժողովում: Նրա շնորհիվ է կառուցվել Նուբարաշեն բնակելի թաղամասը (հիմնադրումը՝ 1930 թ., նախագիծը՝ ճարտարապետ Ալեքսանդր Թամանյանի), որտեղ բնակություն են հաստատել Հունաստանից, Ֆրանսիայից, Լիբանանից, Սիրիայից և Բուլղարիայից հայրենադարձված հայեր:

 «Պատմամշակութային ժառանգության գիտահետազոտական կենտրոն» ՊՈԱԿ 

Երևանի քաղաքապետարան