ՀՈՒՇԱՐՁԱՆՆԵՐ
ՀՈՒՇԱՐՁԱՆ ԿԱՐՈ ՀԱԼԱԲՅԱՆԻ
1997 թ.
Պետ. ցուցիչ՝ 1.6.125
Ճարտարապետ՝ Ռոմեո Ջուլհակյան
Հուշարձանը գտնվում է Օղակաձև զբոսայգում՝ Մոսկովյան փողոցի հարևանությամբ:
Նվիրված է ճարտարապետ ՀԽՍՀ արվեստի վաստակավոր գործիչ, ԽՍՀՄ ճարտարապետական ակադեմիայի ակադեմիկոս Կարո Հալաբյանին (1897-1959), ով Երևանում և Մոսկվայում 1930-1950-ական թթ. կառուցված բնակելի, վարչական, մշակութային և բազմաթիվ այլ շենքերի հեղինակ է: Տեղադրվել է Հալաբյանի ծննդյան 100-ամյակի առթիվ:
Ճարտարապետական փոքր ձևի մեջ ներդաշնակորեն համադրված անտիկ և վաղ միջնադարյան ճարտարապետության տարրերն ստեղծում են եռանկյունաձև երեք խորշերով մշակված հոնիական խոյակի կուռ հորինվածք: Խոյակի դիմային հարթության վրա փորագրված է.
ՃԱՐՏԱՐԱՊԵՏ
ԿԱՐՈ ՀԱԼԱԲՅԱՆԻՆ
ԾՆՆԴՅԱՆ 100 ԱՄՅԱԿԻ ԱՌԹԻՎ:
Հակառակ երեսին տեղադրման տարեթիվն է՝ 1997: Կերտված է սրբատաշ, զանգվածեղ բազալտ քարերից:
Վաստակաշատ ճարտարապետի հիշատակը հավերժացնող ուշագրավ հուշարձան է:
«Պատմամշակութային ժառանգության գիտահետազոտական կենտրոն» ՊՈԱԿ
Երևանի քաղաքապետարան
Օղակաձև զբոսայգի
