ՀՈՒՇԱՐՁԱՆՆԵՐ

2004 թ.

Քանդակագործ՝ Հայկ Թոքմաջյան

Անգլիացի նշանավոր բանաստեղծ, լորդ Ջորջ Գորդոն Բայրոնը (1788-1824) բարձր է գնահատել հայերին ու հայոց լեզուն, մտահոգ էր պարսկաթուրքական լծի տակ տառապող ժողովրդի ճակատագրով: 1816 թ., այցելելով Վենետիկի Սբ Ղազար կղզի և մի քանի տարի ապրելով հայկական Մխիթարյան միաբանությունում, նա սովորել է հայերեն, մասնակցել հայոց պատմության դասընթացներին, անգլերեն-հայերեն, հայերեն-անգլերեն բառարանների ու քերականական ձեռնարկների ստեղծմանը, կատարել թարգմանություններ և այլն: Բայրոնի հայերենի ուսուցիչը միաբանության անդամ, լեզվաբան, թարգմանիչ, բառարանագիր, բազմաթիվ լեզուների գիտակ հայր Հարություն Ավգերյանն էր (1774-1854):

2004 թ. երախտապարտ հայ ժողովուրդը Նորքի առաջին զանգվածում՝ Ֆրիտյոֆ Նանսենի անվան այգում, Նանսենի թանգարանի մոտ տեղադրել է Բայրոնի հուշարձանը՝ որպես հարգանքի տուրք երիտասարդ տաղանդավոր բանաստեղծին:

Քանդակը կարմիր տուֆից է՝ տեղադրված բազալտե սրբատաշ ու ցածր պատվանդանի վրա: Բանաստեղծը պատկերված է բացված գրքին հենված դիրքով, մտախոհ հայացքով: Աջ կողմում Հարություն Ավգերյանի (1774-1854) քանդակն է: Գետնին դրված կարմիր տուֆե սալի վրա փորագրված է՝   

ԻՆՉՔԱՆ ԷԼ ՈՐ ՀԱՅԵՐԻ ՃԱԿԱՏԱԳԻՐԸ ԴԱՌՆ Է ԵՂԵԼ

ԵՎ ԻՆՉՊԻՍԻՆ ԷԼ ՈՐ ԱՅՆ ԼԻՆԻ ԱՊԱԳԱՅՈՒՄ, ՆՐԱՆՑ

ԵՐԿԻՐԸ ՀԱՎԵՐԺ ՊԵՏՔ Է ՄՆԱ ԱՇԽԱՐՀԻ

ԱՄԵՆԱՀԵՏԱՔՐՔԻՐ ԵՐԿՐՆԵՐԻ ՇԱՐՔՈՒՄ.

ՀԱՅՈՑ ԼԵԶՈՒՆ ԱՍՏԾՈՒ ՀԵՏ ԽՈՍԵԼՈՒ ՄԻԱԿ ԼԵԶՈՒՆ Է.

ՋՈՐՋ ԳՈՐԴՈՆ (ԼՈՐԴ) ԲԱՅՐՈՆ:

Հուշաքարի ստորին մասում անգլերեն և հայերեն լեզուներով գրված է ՝ BYRON, ԲԱՅՐՈՆ:

Ձախակողմյան հատվածում փորագրված են քանդակագործի անունն ու տարեթիվը՝ ՀԱՅԿ ԹՈՔՄԱՋՅԱՆ. 2004:

Քանդակի բարձրությունը 1.65 մ է, պատվանդանի չափերն են՝ 0.36 x 1.44 x 2.40 մ:

«Պատմամշակութային ժառանգության գիտահետազոտական կենտրոն» ՊՈԱԿ

Երևանի քաղաքապետարան