ՀՈՒՇԱՐՁԱՆՆԵՐ

1931

Պետ. ցուցիչ՝ 1.6.101

Ճարտարապետ՝ Իվան Ժոլտովսկի

Քանդակագործ՝ Սերգեյ Մերկուրով

Բոլշևիկ հեղափոխական, քաղաքական գործիչ, հրապարակախոս, Բաքվի կոմունայի ղեկավար Ստեփան Շահումյանի (1878-1918) հուշարձանը գտնվում է նույնանուն հրապարակի հյուսիսարևելյան մասում։ Բացումը տեղի է ունեցել 1931 թ. սեպտեմբերի 20-ին: Կառուցվել է նախկին ռուսական Սուրբ Նիկոլայ եկեղեցու տեղում՝ Տաճարական հրապարակում (այժմ՝ Ստեփան Շահումյանի հրապարակ)։ Հուշարձանի հեղինակներն են ԽՍՀՄ ժողովրդական նկարիչ, քանդակագործ Սերգեյ Մերկուրովը և ճարտարապետության ակադեմիկոս Իվան Ժոլտովսկին։ Երևանում պաշտոնապես տեղադրված առաջին կոթողային հուշարձանն է։ Երկմաս է՝ բաղկացած արձանից և թիկունքում աստիճանավոր հիմքի վրա բարձրացող ձևավոր պատից՝ յոթ հզոր ուղղանկյուն մույթերով: Եզրային երկու մույթերը ստեղծում են որմնախորշեր: Պատը մուգ մոխրագույն բազալտից է: Արձանը կերտված է վարդագույն գրանիտի ամբողջական կտորից: Դրված է ընդհանուր հիմքից բարձրացող քառակուսի, աստիճանաձև պատվանդանի վրա: Բարձրությունը 3,5 մ է։ Կերպարը պատկերում է Շահումյանին ամուր կանգնած, խաչված ձեռքերով՝ արտահայտելով անսասանություն և ուժ։