ԵՐԵՎԱՆԻ ԺԱՄԱՆԱԿԱԳՐՈՒԹՅՈՒՆԸ

Դեկտեմբերի 11-ին Երևանում՝ Կարեն Դեմիրճյանի անվան մարզահամերգային համալիրում, կայացավ «Մանկական Եվրատեսիլ 2022» երգի 20-րդ մրցույթը:

Երևանն արդեն երկրորդ անգամ էր հյուրընկալում «Մանկական Եվրատեսիլ» մրցույթը։ 

2011 թվականին Վլադիմիր Արզումանյանն իր «Մամա» երգով հաղթեց մրցույթում, իսկ 2021 թվականին Փարիզում 14–ամյա Մալենան գրավեց առաջին տեղը։ 

20-րդ հոբելյանական Մանկական Եվրատեսիլին մասնակցեցին 16 երկրի ներկայացուցիչներ, որոնց միավորում էր «Պտտի՛ր հրաշքը» կախարդական կարգախոսը: 

Մասնակից երկրներն էին՝ Ալբանիա, Իռլանդիա, Իտալիա, Իսպանիա, Լեհաստան, Հայաստան, Հյուսիսային Մակեդոնիա, Ղազախստան, Մալթա, Նիդեռլանդներ, Պորտուգալիա, Սերբիա,  Ուկրաինա, Միացյալ Թագավորություն, Վրաստան, Ֆրանսիա: 

Մրցույթի այս տարվա խորհրդանիշը միջազգայնորեն ճանաչված խաղալիքն էր՝ հոլը, որի այս տեսակը հատուկ է հայկական մշակույթին և զարդարված է ազգային նախշերով: Հայաստանում նման խաղալիքի ոճավորված տարբերակները կարելի է տեսնել պատմական-ճարտարապետական հուշարձանների, գորգերի և տարազների վրա։ Ավանդական փայտե «հոլին» տրվել էր նեոնային տեսք, որն արտացոլում է ժամանակակից Հայաստանը։ Այն հրաշալի արտացոլում էր նաև «Մանկական Եվրատեսիլի» արժեքները՝ բոլորը միավորվում են հրաշքի, երաժշտության և ուրախության գաղափարի շուրջը և, միևնույն ժամանակ, առանձնանում են իրենց երգով ու ելույթով: 

Մրցույթը վարեցին երգչուհիներ Իվետա Մուկուչյանը, Կարինա Իգնատյանն և դերասան, երգերի հեղինակ՝ Գարիկ Պապոյանը:

Հայաստանը ներկայացրեց 14-ամյա Նարե Ղազարյանը “Dance!” երգով: 

«Մանկական Եվրատեսիլ 2022» երգի մրցույթում հաղթող ճանաչվեց Ֆրանսիայի ներկայացուցիչ Լիսանդրոն՝ «Oh Maman» երգով: Հայաստանի ներկայացուցիչը զբաղեցրեց երկրորդ հորիզոնականը: