ԲԼՈԳ
Ավելի շատ իտալացի ճանապարհորդներ սկսել են բացահայտել Հայաստանը
2025 թվականին Հայաստանն ընդունել է Իտալիայից ժամանած 22,669 այցելու՝ նախորդ տարվա համեմատ գրանցելով 40.7% աճ։
Հայաստանը շարունակում է ժողովրդականություն վայելել իտալացի ճանապարհորդների շրջանում։ 2025 թվականին երկիրն ընդունել է 22,669 այցելու Իտալիայից՝ 2024 թվականի համեմատ արձանագրելով 40.7% աճ։
Այս աճին նպաստել են դեպի Երևան ուղիղ չվերթների բարելավումը և Հայաստանի մշակութային ժառանգության, բնության, արկածային տուրիզմի ու գաստրոնոմիայի յուրահատուկ համադրության հանդեպ աճող հետաքրքրությունը։
Այժմ Երևանը հեշտությամբ հասանելի է Իտալիայից Wizz Air ավիաընկերության ուղիղ չվերթներով Միլանից, Վենետիկից, Հռոմից, Նեապոլից և Բարիից, ինչպես նաև FlyOne Armenia ավիաընկերության չվերթներով Բերգամոյից և Հռոմից, ինչը Հայաստանը դարձնում է գրավիչ ուղղություն թե՛ երկարատև արձակուրդների, թե՛ կարճատև քաղաքային հանգստի (city break) համար։
ՅՈՒՆԵՍԿՕ-ի համաշխարհային ժառանգության ցանկում ընդգրկված հուշարձաններից, ինչպիսիք են Գեղարդավանքն ու Ազատ գետի վերին հովիտը, մինչև հիասքանչ Տաթևի վանքը, Հայաստանն առաջարկում է անմոռանալի մշակութային տպավորություններ։ Երկրի քայլարշավային երթուղիները, գինեգործության ավանդույթները և ինքնատիպ խոհանոցը շարունակում են գրավել իմաստալից և բազմազան փորձառություններ փնտրող ճանապարհորդներին։
«Իտալական շուկայի այս նշանակալի աճը ցույց է տալիս, որ Հայաստանը դառնում է ավելի ճանաչելի ուղղություն՝ առաջարկելով հետաքրքիր, ինքնատիպ և բազմազան զբոսաշրջային փորձառություններ», — նշել է ՀՀ զբոսաշրջության կոմիտեի նախագահ Լուսինե Գևորգյանը։
Իր հարուստ պատմությամբ, հիասքանչ բնապատկերներով և ջերմ հյուրընկալությամբ Հայաստանը դառնում է ավելի ու ավելի նախընտրելի ուղղություն իտալացի ճանապարհորդների համար։
Ամբողջական հոդվածը՝ այստեղ։
